Facebook
Twitter
Google+
YouTube
Blog
RSS Feed
වෙසෙස් බූන්දි
මෑන් බූකර්, ජූලියන් බාර්න්ස් සහ The Sense of an Ending
බූන්දි, 16:41:14
2011, ප්‍රබන්ධ සාහිත්‍යය සඳහා වන මෑන් බූකර් සම්මානය දිනා ගත්තේ "The Sense of an Ending" නවකතාවෙහි කර්තෘ ජූලියන් බාර්න්ස් ය. පසුගිය තෙවතාවකදී ම, ඔහුගේ නවකතා බූකර් සම්මානය සඳහා නිර්දේශ වුව ද, ඒ සියළු අවස්ථාවන්හි දී, බාර්න්ස් ට එම අවස්ථාව මඟ හැරී ගියේ ය. ඒ, Flaubert's Parrot (1984), England, England (1998) සහ Arthur and George (2005) යන නවකතා ත්‍රිත්වය යි.

The Sense of an Ending නවකතාව ජොනතන් කේප් ප්‍රකාශනයක් වන අතර, මෙය ජොනතන් කේප් ලද 8 වන මෑන් බූකර් සම්මානය යි. එමෙන්ම, Carol Birch ගේ Jamrach's Menagerie, Patrick de Witt ගේ The Sisters Brothers, Esi Edugyan ගේ Half Blood Blues, Stephen Kelman ගේ Pigeon English සහ A. D. Miller ගේ Snowdrops යන කෘති, 2011 වසර සඳහා නිර්දේශ වී තිබුණු අනෙක් ඒවා වෙයි.

මෑන් බූකර් සම්මාන ප්‍රදානෝත්සවය

Booker-McConnell වෙළඳ සමාගම විසින් 1968 දී, ඉංග්‍රීසි සාහිත්‍යය තුළ වර්ධනයක් ඇති කිරීම සඳහා පොදු රාජ්‍ය මණ්ඩලයීය රටවල සහ අයර්ලන්තය, සිම්බාබ්වේ ඇතුළු රටවල් මූලික කරගෙන ආරම්භ කරන ලද්දකි. ආරම්භයේ දී එය, Booker-McConnell Prize යනුවෙන් හැඳින්වුව ද, පසුකාලයේ දී, "Booker Prize" නැතහොත්, "The Booker" යනුවෙන් හඳුන්වන්නට යෙදුණි. 2002 වසරේදී, "Man Group" සමාගම ඒ හා එකතු වීමත් සමඟින් එය, The Man Booker Prize නමින් හඳුන්වයි.

ආරම්භයේ දී ජයග්‍රාහකයා වෙත, පවුම් 21,000ක ත්‍යාග පිරිනැමීමක් කළ ද, මේ වන විට බ්‍රිතාන්‍ය පවුම් 50,000 ක් පිරිනමන අතර මෙය ලෝකය පුරා, සාහිත්‍යය සඳහා පිරිනැමෙන විශාලතම තිලිණය වෙයි. 2004 වසරේ සිට ජාත්‍යන්තර බූකර් සම්මානය ද පිරිනමන අතර එම කෘතිය ඉංග්‍රීසි භාෂාවෙන් ලියන ලද්දක් හෝ ඉංග්‍රීසි භාෂාවට පරිවර්තනය කරන ලද්දක් විය යුතු ය.

ජූලියන් බාර්න්ස්

නවකතා, කෙටිකතා, පුවත්පත් ලිපි, විචාර ආදී විවිධ ලේඛන ශෛලීන් හි ප්‍රවීණ‍යෙකු වන ජූලියන් පැට්‍රික් බාර්න්ස්, 1946 ජනවාරි 19 දා, ලයිසස්ටර් (Leicester) හි උපත ලද බ්‍රිතාන්‍ය ජාතික ලේඛකයෙකි. ඔහු, 1968 වසරේ ඔක්ස්ෆර්ඩ් විශ්ව විද්‍යාලයයෙන් පිටවීමෙන් පසු, ඔක්ස්ෆර්ඩ් ඉංග්‍රීසි ශබ්දකෝෂ අතිරේකය නිම කිරීම සඳහා ශබ්දකෝෂ කර්තෘවරයකු වශයෙන් වසර තුනක කාලයක් සම්බන්ධ වී සිටියේ ය. 1977 වසරේ සිට the New Review පුවත්පත සහ the New Statesmen සඟරාවෙහි විචාරයකු මෙන්ම සාහිත්‍යාංග කර්තෘ වශයෙන් ද රැකියාව කළේ ය. පසුව ඔහු රූපවාහිනී විචාරයකු වශයෙන් ද, පුවත්පත් වලට ලිපි සැපයුවේ ය.

බාර්න්ස් ලේඛණය හරිහැටි ආරම්භ කරන ලද්දේ 1980 වසරේ සිට ය. ඔහු, ලේඛණයට පිවිසි වකවානුවේ දීත්, පසුව විටින් විට කිහිප අවස්ථාවකදීත්, Dan Kavanagh යන ආරූඪ නාමයෙන් ද නිර්මානකරණයේ යෙදෙන්නට වූයේ ය. 1979 වසරේ දී Patricia Olive Kavanagh සමඟ බාර්න්ස් විවාහයට පිවිසීමෙන් අනතුරුව ඇයගේ වාසගම ද එකතු කරගනිමින් ඔහු එම අන්වර්ථ නාමය සකසා ගෙන තිබුණි. 1980 වසරේ දී "Duffy", 1981 දී "Fiddle City", 1985 දී Putting the Boot In සහ 1987 දී Going to the Dogs යන ත්‍රාසජනක නවකතා සතර ඔහු ප්‍රකාශයට පත් කරන ලද්දේ Dan Kavanagh යන අන්වර්ථ නාමයෙනි.

බූකර් සම්මාන ප්‍රදානය- 2011

2011 මෑන් බූකර් සම්මානය සඳහා වූ විනිශ්චය මණ්ඩලයේ ප්‍රධානී, ඩේම් ස්ටෙලා රිමින්ග්ටන් සම්මාන ප්‍රදානෝත්සවයේ දී මෙසේ පැවසුවා ය;
"The Sense of an Ending නවකතාව ඔස්සේ ජූලියන් බාර්න්ස්, සම්භාව්‍ය ඉංග්‍රීසි සාහිත්‍යය තුළ නොමැකෙන සළකුණක් තබයි. ඉතා විශිෂ්ට, සියුම් ක්‍රමෝපායන් සහිත, කියවන්නා තුළ නව ගැඹුරු මානයක් ඇති කරන්නා වූ ද, 21 වන ශත වර්ෂයේ මනුෂ්‍ය වර්ගයා වෙත ආමන්ත්‍රණය කරන්නා වූ ද ග්‍රන්ථයකි."



ජූලියන් බාර්න්ස් මේ පිළිබඳව මාධ්‍යය වෙත ලබා දුන් එකම සාකච්ඡාවේ දී මෙසේ පැවසුවේ ය. "මම කිසිවිටෙකත් චරිත වලින් පටන් ගන්නෙ නෑ. මම පටන් ගන්නෙ චරිත පිළිබඳ වන අවකාශය, සදාචාරාත්මක පසුබිම හරහා. ඉන්පස්සෙ උත්සාහ කරනවා, කවුද එය කරන්නෙ කියන එක."

ඔහුට අනුව නවකතාව සැකිලි ද්විත්වයකින් සමන්විත වෙයි. එනම් හරියටම එය බහිස්සැකිල්ලකින් හා අභ්‍යන්තර සැකිල්ලකින් සමන්විත කබැල්ලෑවකු හා සමානය. බහිස්සැකිල්ල යනු කතාවේ සමස්ත ආකෘතිය යි. ඔහු ට අවශ්‍ය වූයේ ඔහුගේ නව කතාව කෙටි ආරම්භයක් සමඟ දිගු අවසානයක් කරා ගෙන යෑමට ය. එහෙත් සිදු වූයේ ඇරඹුම දිගු වී, අවසානය කෙටි වීම ය.

අභ්‍යන්තර සැකිල්ල පිළිබඳ ඔහුගේ පැහැදිලි කිරීම මෙසේය. "මම ඊට සැකිල්ල කියා කියනවා. ඒත් ඒක හරියටම කාටිලේජ වගේ. ලිවීම අතරතුර සැකිලි ගණනක් මතු වෙනවා. කාලය සහ මතකය පිළිබඳ අදහස් ක‍්‍රියාකරන්නෙ හරියටම පොතේ මාංශ පේශි වගේ."

"ලිවීම සැලසුම් සහගත දෙයක් වනවා වෙනුවට, පෙනෙන හැට්යට කතුවරයෙකුගේ කාර්යය වඩා සමීප වන්නේ ශල්‍ය වෛද්‍යවරයෙකුටයි. එනම් පණ ගැහෙන, හුස්ම වැටෙන දේ සමග කටයුතු කරන පරිපූර්ණ මිනිස් ප‍්‍රයත්නයකයට." ඔහු තවදුරටත් මාධ්‍ය අමතා කියා සිටියේය.

The Sense of an Ending

බාර්න්ස්, The Sense of an Ending නවකතාව, විශ්ව සාහිත්‍යය තුළ සළකුණු කරනු වස්, යථාර්ථය, දක්ෂතාව, සහ සූක්ෂම දෘෂ්ටිය නොහොත් ප්‍රඥාව ඊට බන්ධනය කරයි. යමෙකු ජීවත් වූ කාලය තුළ, කළ කී දෑ තමන් පසුපස සෙවණැල්ලක් සේ පැමිණෙන ආකාරය මෙනෙහි කිරීමට පාඨකයා පොළඹවන්නා සේම, ඉන් ජීවිතය ව්‍යාකූලත්වයට පත් වන ආකාරය සංවාදයට ලක් කරමින්, The Sense of an Ending හි, පෙළ ඇදී යයි.

ටෝනි වෙබ්ස්ටර් ඇතුළු කණ්ඩායම ට පාසලේ දී, ඒඩ්‍රියන් ෆින් මුණ ගැසෙයි. ටෝනි, ඇලෙක්ස් සහ කොලින් අතරට එක් වන අලුත් සාමාජිකයා වන්නේ ඒඩි‍්‍රයන් ය. සෙල්ලක්කාර නව යෞවනයෝ, තාරුණ්‍යයේ නැගී එන කාමාශාවන් පිළිබඳ කතා කිරීමටද, දැඩි ලෙස පොත්පත් කියවීමට ද කැමැත්තෝ ය. සැහැල්ලුවෙන්, විනෝදයෙන් කාලය කා දමන මෙම තරුණන් අතරින් ඒඩ්‍රියන් සහ ටෝනි සමීප මිතුරන් බවට පත් වෙති. ඒඩ්‍රියන්, තරමක නිවට පෙණුමක් ඉසුළුව ද, ඔහු ඔවුනට වඩා කල්පනාකාරී ය. බුද්ධිමත් ය. ඉගෙනීමෙහි ඉතා දක්ෂ ය. කෙසේ වුව ද, ඔවුන් මිතුරන් බවට පත් වීමෙන් පසු, එකිනෙකා අතර මිත්‍රත්වය, සදාකල් ආරක්ෂා කරගන්නට ඔවුනොවුන් ප්‍රතිඥා දී තිබුණි. එකිනෙකා, තම තමන්ට රිසි සේ උසස් අධ්‍යාපනය තෝරා ගන්නා අතර, හැකි අවස්ථා වලදී මුණ ගැසෙන්නට අමතක නොකරයි. විටෙක ඔවූහු, එකිනෙකා සමඟ ලිපි හුවමාරු කරගනිමින් සැපදුක් විමසති. මේ අතර, ටෝනි වෙබ්ස්ටර් ට වෙරෝනිකා මුණ ගැසෙයි. ඔවූහු පෙම්වතුන් බවට පත් වෙති.

ජීවිතය යනු අහම්බයක් දැයි අපට සිතෙන්නේ එදිනෙදා අප මුහුණ දෙන ගැටළු නිසා ය. විටෙකදී අප ප‍්‍රතික්ෂේප කරන දෑ වුව ද සිදු වන විටදී ය. තාරුණ්‍යය වේගවත් ය. ආවේගශීලි ය. කාලයත් සමඟ සිතුවිලි පරිණත වන්නේ අප ලබන අත්දැකීම් සහ දැනුම් සම්භාරය නිසා ය.



ටෝනි සහ වෙරෝනිකා අතර සම්බන්ධය කැඞී යාමත්, පසුකාලයේ දී, තම මිතුරා වූ ඒඩි‍්‍රයන් සමඟ වෙරෝනිකා අතර ඇති වන සම්බන්ධය නිසා ඔවුනොවුන් අතර ඇති මිත‍්‍රත්වය එක්තරා නිහඬ බවක් ඉසිලීමත්, බාර්න්ස්, එදිනෙදා කාර්යබහුල වන සාමාන්‍ය ජීවිතය ඔස්සේ හුවා දක්වයි. ඒඩි‍්‍රයන් සහ වෙරෝනිකා අතර සම්බන්ධය සැල වීමෙන්, ටෝනි කෝපයට පත් වන ආකාරය සෑම පේ‍්‍රමවන්තයකුටම පොදු බව සමාජය දෙසට හැරීමෙන් දකිත හැකිය. ටෝනිගේ ආවේගශීලි ලිපිය ඒඩි‍්‍රයන් නමට තැපෑලට යැවෙන අතර, කාලයත් සමඟින් ඔවුන් එකිනෙකා තම ජීවන මාර්ගයන් සොයා ගනී. නමුදු, හදිසියේ ම දිනෙක, ඒඩ්‍රියන් සියදිවි නසා ගනී. ඔහු ගේ මරණය දරා ගත නොහැකිව ඔවුහූ වික්ෂෝප වන අතර, විශේෂයෙන් ම ටෝනි, මෙම ඛේදවාචකය අමතක කර දැමීම සඳහා දැඩි වෙහෙසෙක් ගනියි.

මෙම නවකතාවෙහි හරවත්ම සහ උණූසුම් ම අවස්ථාවන් පැමිණෙනුයේ, ජීවිතයේ සැඳෑ සමයට ලං වෙමින් හිඳින ටෝනි ගේ අතීතාවර්ජන කතාවන් හරහා ය. මිනිසා යනු රහසින් පව් කරන්නෙකි. එසේ වුව ද, යම් මොහොතකදී, ඔහුට තම හෘදය සාක්ෂිය සමඟ ගැටීමක් ඇති වෙයි. තරුණ ජවයත් සමඟින් පාලනය කරගත නොහැකි ආවේගයන්හි ප‍්‍රතිවිපාක, දිනෙක පෙර ළා තමන් වෙත ඇදී එයි. වසර 40කට පසු ටෝනි වෙබ්ස්ටර් මුහුණ දී සිටින්නේ එවන් අර්බුදයකට ය.

උසස් අධ්‍යාපනයෙන් පසු තමන් කැමැති රැකියාවක් තෝර ගන්නා ටෝනි, මාගරට් හා විවාහ වෙයි. ටෝනි ගේ ජීවිතය සාර්ථකත්වයට පත් වන අතර, අතීතය සම්පූර්ණයෙන්ම අමතක කර දමා දියණිය සමඟ ඔවුන් සතුටින් කල් ගෙවයි. කාලයත් සමඟ එකිනෙකා අතර ඇතිවන විවිධ නොගැලපීම් හඳුනා ගැනීමෙන් අනතුරුව දික්කසාද වෙයි.

දික්කසාදය යනු පෙරදිග අපට මේ වන තුරුත්, ජීවිතයට සමපාත කරගැනීමට අපහසු කාරණාවකි. දරුවන් නිසාම ජීවිතය දෙස උපේක්ෂාවෙන් බලන්නට අප කැමැති ය. කාලයත් සමඟ බොහෝ දේ වෙනස් වෙයි. බටහිර රටවල, එකතු වන ප‍්‍රමාණයට වඩා, වෙන් වන ප‍්‍රමාණය වැඩි දැයි සිතෙන තරමට ඔවූහු ජීවිතය සොයා යති. කිසිවිටෙක තමන් ආදරය කළ හෝ විවාහ වී සිටි අය අතර පසුකාලයේ දී අඩදබර හෝ වෛර කිරීම් දකින්නට නැත. නොගැලපීම් තේරුම් ගන්නා ඔවූහු වෙන් වීමෙන් හෝ දික්කසාදයෙන් අනතුරුව, බොහෝ විට මිතුරන් බවට පත් වෙති. දුක් කරදර අවස්ථා වලදී ඒවා බෙදා ගනිති.



දිනෙක, නීතිඥවරයකු වෙතින්, කිසිදු බලාපොරොත්තුවක් නැති ලිපියක් ටෝනි නමට ලැබෙන අතර, ඉන් මවිත පත් වන ටෝනි, අතීතාවර්ජනයෙහි යෙදෙයි. වැළලී ගිය අතීතය, දුමාරයෙන් වැසී ගිය අහසක් මෙන් ඔහු ඉදිරියේ නැවත දිග ඇරෙයි. එහි ඇත්තේ, ඔහුගේ පැරණි පෙම්වතියගේ මව විසින් මිය යන්නට පෙර ලියන ලද ලිපියකි. ඇයගේ වත්කමෙන් පවුම් 500ක් සහ ඔහුගේ පාසල් සමයේ සමීපතම මිතුරා, ඒඩ්‍රියන් විසින් එ දවස් හි ලියන ලද දින පොත ඔහුට එමඟින් බාර කර ඇත.

ඒඩ්‍රියන් ජීවත් වූ අවසන් මාස කිහිපය සතුටින් ගත කළ බව ද, ඔහු විසින් සටහන් තබන ලද දින පොත, ටෝනි අතර පත් කිරීම සුදුසු යැයි ඈ විශ්වාස කරන බව ද, ඈ ලියා තිබුණා ය. ටෝනි ඒ ඔස්සේ අතීත ස්මරණය කරන්නට පටන් ගැනීමත් සමඟින් මනුස්ස ජීවිතය දෙස දාර්ශනික බැල්මක් යොමු කරන්නට බාර්න්ස් වෙර දරයි. ජීවිතයේ යථාව, අදූරදර්ශීභාවයන් සහ ඒ පසුපස හඹා එන ප්‍රතිවිපාක ආදිය කෙතරම් දැයි ටෝනි වෙබ්ස්ටර් හරහා සංවාදයක යෙදෙන්නට බාර්න්ස් සමත් වෙයි.

තම මිත්‍රයාගේ මරණයට තමන් කොතෙක් දුරට වගකිව යුක්තෙක් දැයි ඇති වන වරදකාරී හැඟීමෙන් වෙහෙසට පත් වන ටෝනි, තම හෘදය සාක්ෂ්‍ය හමුවේ කෙතෙක් නම් අසරණ වන්නේ ද යන්නත්, තමන් වපුල දේට කෙනෙකුට ඵල නෙළා ගන්නට සිද්ධ වන බවත් පාඨකයාට කියා දෙයි. මෙහි අදිසි කතා නායකයා වනුයේ ඒඩ්‍රියන් ෆින් ය. ඔහු වටා කතාව ගෙතෙන අතර, කතා නායක ටෝනි වෙබ්ස්ටර්, ජීවිතය පරිච්ඡේදයෙන් පරිච්ඡේදයට වෙන් කර, මිනිස් සිත පිළිබඳ විවරණයක යෙදෙයි. මනස ක‍්‍රියා කරන ආකාරය සහ ජීවිතය තුළ ඇති හැලහැප්පීම්, ගැටළු, අතපසුවීම් සහ මානුෂික සම්බන්ධතා යනාදිය, ජූලියන් බාර්න්ස් මෙහිදී මැනවින් විවර කර පෙන්වයි. ඈත් වී යන දූ දරු සම්බන්ධතාව, සීඝ‍්‍රයෙන් පැතිර යන තාක්ෂණික දියුණුව සහ අන්තර්ජාලය මිනිස් සමාජය තරණය කර ඇති ආකාරය පවා මතු කරන්නට ඔහු වෙහෙසෙයි. අවසානයේ දී, ජීවිතය යනු, හුදෙකලාවට එහා ගිය කිසිවක්, ශුන්‍ය බවක් ඉස්මතු කරයි. නැතහොත් හෙම්බත් වුණු ජීවිතය, කිසිවක් අපේක්ෂා නො කරයි. සාපේක්ෂව විමසා බලන කළ බෞද්ධ දර්ශනය මෙම නවකතාව තුළ පදනම් වී ඇති බවක් අපට හැඟෙන්නේ නම් එය පුදුම විය යුත්තක් නොවන අතර, බටහිර රටවල ”දර්ශනය” නමින් ඒ ගැන සංවාදයෙහි යෙදෙනු ඔබට කොතෙක් හෝ අසන්නට ලැබෙන්නේ ද එහි ම සංක්ෂිප්තය වෙයි.

මෙම නවකතාව කියවා ගෙන යද්දී, අප ජීවිතය සමඟ කෙසේ ගනුදෙනු කරන්නේ ද, ජීවිතය අප සමඟ කෙසේ ගනුදෙනු කරන්නේ ද යන්න මෙයින් තව දුරටත් පැහැදිලි කර දෙන බව පාඨකයාට හැඟේ. ජීවිතය යනු අප කරන, කියන දෙය ය. කළ, කී දෑ දෙස හෙට දවසේ දී කණගාටු වනු ද, ප්‍රීති වනු ද යනු, අප ජීවත් වූ ආකාරය යි. නැතහොත් අද අප කෙසේ ජීවත් වන්නේ ද යන්නයි.
මේ වියමන ඔබේ මූණු පොතට එක් කරන්න-
Tags- Julian Barnes, The Sense of an Ending, The Man Booker International Prize
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
තුෂාරි ප්‍රියංගිකාගෙන් තවත් වියමන්
කවි
ජානූ! පේ‍්‍රමයෙන් විතැන් විය හැකි දැයි මට කියන්න
කවි
යෞවනය!
කවි
සිද්ධාර්ථ සහ මරියා ගේ පේ‍්‍රමයේ මහිමය!
කරන්ට්ස්
අපේ හුස්ම බිංදුව තියෙන්නෙම උඹ ළඟයි දුවේ!
කවි
කැමීලියා මලේ හැම පෙත්තකම ආදරේ කවි ලියා ඇත.
තවත් වෙසෙස් බූන්දි
ඇනා කැරනිනා සහ ඇනා ස්ටෙපානොව්නා
පාවුලෝ කොයියෝ හෙවත් පිස්සෙකු ගේ කතාව
සුන්දර කළු කෙල්ල- රූපී කෞවුර්ගේ අතිශය සුන්දර ආත්මය!
අරාබි සාහිත්‍යයේ ඛලීල් සලකුණ
තෝල්ස්තෝයි අදට වලංගු ද?
BoondiLets
කැරොලිනා මාරියා ඩි ජීසස් ලියයි.
ජනාධිපතියො, උඹ කූඩුවක ඉන්න ගිරවෙක්. ලස්සන ලස්සන කතා කියනවා. ඒත්, බඩගින්නෙ ඉන්න මිනිස්සු ව්‍යාඝ්‍රයෝ කියලා හිතා ගන්න එක හොඳයි. උන් ඉන්නෙ කෝපයෙන්. අවස්ථාව ආපු ගමන්... [More]
What's New | අලුතෙන්ම
කවි| ආනන්ද

31-Secs

(රෝහණ පොතුලියැද්ද) මාලා කරුවෙකු සේ මල් සොයා යන
සසර සැරි ගමනක ඉම
අතහැරීම ම නිවන කියන උතුමෙකු
අත නෑර අල්ල ගති ආනන්ද

මල,පැහැය,සුවඳ, ඈ... [More]
Cine| අසන්ධිමිත්තා- වෘත්තයෙන් ආපස්සට

3-Mins

(ඩිල්ෂානි චතුරිකා දාබරේ) සාහිත්‍යය හෝ සිනමාපට තවදුරටත් සාම්ප්‍රදායික ආකෘතියම නොපතයි. රසවිඳින්නන්ව සාමාන්‍ය කතාවකින් නළවාදැමීමට නොහැකිය. තවදුරටත් ඔවුහුද හුරුපුරුදු නිර්මාණ ස්වභාවයම නොපතති. නිර්මාණකරුවකු... [More]
Cine| රාමු තුළ යළි රාමු වුණු "දැකල පුරුදු කෙනෙක්"

6-Mins

(විකුම් ජිතේන්ද්‍ර) මේ යුගය ඡායාරූප හා කැමරා යුගයක් වන අතර වෘත්තීය හෝ අර්ධවෘත්තීය කැමරා භාවිත කරන ආධුනිකයා පවා අධි සුන්දරත්වයෙන් යුතු ඡායාරූප... [More]
අදහස්| To Sir, With Love!

2-Mins

(තාරක වරාපිටිය) To Sir With Love යනු මීට වසර 28 කට පමණ ඉහතදී කළු සුදු ටෙලිවිෂන් තිරයකින් මා බැලු චිත්‍රපටයකි. එය එතෙක්... [More]
වෙසෙස්| මැදියම් රැයේ වාහනවලට අතවනන සුදු හැඳි ගැහැනිය

5-Mins

(තිලක් සේනාසිංහ ) අද මෙන් මහජනයා හෝ රථවාහන බහුල නොවූ මීට දශක හය හතකට පෙර ඇතැම් දිනවල මැදියම් රැය ආසන්නයේ දී කොළඹ බොරැල්ලේ... [More]
ඔත්තු| හෙල්මලී ගුණතිලකගෙන් 'සහස් පියවර'

5-Secs

හෙල්මලී ගුණතිලක විසින් රචිත පළමු කෙටිකතා එකතුව වන 'සහස් පියවර' කෘතිය මුද්‍රණද්වාරයෙන් එළි දක්වා තිබේ.... [More]
පොත්| ඉණෙන් හැලෙන කලිසමක් රදවා ගන්න තතනමින්...

2-Mins

(රෝහණ පොතුලියැද්ද) පුද්ගල නාමයක්, වාසගමක් දුටු කල්හි ඔහුගේ ජාතිය/ ආගම/ කුලය/ ලිංගය/ ග්‍රාමීය, නාගරිකබව සිතියම් ගත කිරීම සාමාන්‍ය පුරුද්දක්. නමුත් "ඩොමිනික් චන්ද්‍රසාලි"... [More]
කෙටියෙන්| මොන එල්ලුං ගස් ද?

10-Secs

(සුරත්) කුඩුකාරයෝ ටික විජහට එල්ලාලා
බේරා ගනිමු රට ඒකයි හදිස්සිය
මෙත්පල් මැතිඳු මුර ගානා හැටි දැකලා
ගිරවා මගේ දුන්නා එල ටෝක් එකක්

"එල්ලිය යුතු එවුන් දා ගෙන රෙදි අස්සේ... [More]
පොත්| උමතු වාට්ටුවට අප්පචිචී ඇවිත්!

6-Mins

(කේ.ඩී. දර්ශන) 'උඹට එහෙම යන්න බැහැ උඹ ඉන්න ඕනෙ මම ළඟ. මගේ හෙවණැල්ලෙන් මිදෙන්න උඹට බැහැ.'
(-41 පිට)

'මම ගල් ගැහී අප්පච්චී දෙස බලාගෙන... [More]
රත්තරං ටික| මෙන්න බත් කූරෙක්!

28-Secs

මත්සුවා බැෂෝ යනු කෘතහස්ත ජපන් කවියෙකි. බැෂෝගෙ කවිකාර කම දැක දිනක් ඔහුගේ ශිෂ්‍යයෙකු ද කවියක්... [More]
කවි| ජානූ! පේ‍්‍රමයෙන් විතැන් විය හැකි දැයි මට කියන්න

24-Secs

(තුෂාරි ප්‍රියංගිකා) එකින් එක මතක අහුලමි
මංජුසාවකි හදවත මතක අහුරමි
සීත හිමයේ මිදුණු හිමකැටිති යට
ඔබට කවි ලියා සඟවමි
ජානූ!
පසුපස සෙවණැල්ල සේ ඇදෙමි... [More]
පොත්| සෞන්දර්යය වෙනුවට කටු අතු- අපේ යුගයේ උරුමය!

13-Mins

(චූලානන්ද සමරනායක) කිවිඳියකගෙ කාව්‍ය ග‍්‍රන්ථයක් එළිදක්වන මොහොතක ඇගේ කවියට ප‍්‍රවේශ වෙන්න වඩාම සුදුසු මාවත මොකක්ද? මේක ටිකක් විසඳගන්න අමාරු ප‍්‍රශ්ණයක්. මොකද අද... [More]
ඔත්තු| 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්'- දෙසැ. 01

11-Secs

මාලතී කල්පනා ඇම්බ්‍රෝස්ගේ 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්' කාව්‍ය... [More]
වෙසෙස්| වාලම්පුරි- වාසනාව, විහිළුව සහ මිත්‍යාව

1-Mins

(තාරක වරාපිටිය) ලංකාවේ ඉහළ "අලෙවි වටිනාකමක්" ඇති, ‘අනුහස් ඇති’ ගුප්ත වස්තුවකි වාලම්පුරිය. මෙම ‘වටිනාකම’ තීරණය වන්නේ එහි ඇති ද්‍රව්‍යමය වටිනාකම හෝ වෙනත්... [More]
පොත්| "මතක වන්නිය" හෙවත් උතුරේ ශේෂ පත්‍රය

3-Mins

(සුරෝෂන ඉරංග) කලා කෘතියකින් භාවමය කම්පනයක් ඇතිකළ හැකි නම් එයට කිසියම් සමාජ බලපෑමක් සිදුකළ හැකිය. එසේ කම්පනයත්, පශ්චාත්තාපයත් ජනිත කළ, දමිළ බසින්... [More]
අදහස්| විද්‍යාවේ සියවසක පිම්ම!

2-Mins

(තාරක වරාපිටිය) පසුගිය සියවසේ මිනිස් ශිෂ්ඨාචාරය මුහුණපෑ ප්‍රධාන මාරක අභියෝග තුන වුයේ වසංගත, සාගත හා සංග්‍රාමයන්ය. ඒ සියවස තුල එසේ ඉන් මියැදුන... [More]
කරන්ට්ස්| "අඟ"

19-Secs

(උපුල් සේනාධීරිගේ) අංඟ පුලාවකට නැති මිනිස්සු
තම හිස අත ගෑහ
අඟක්... ඔව් අඟක්
රයිනෝසිරසක හැඩගත් අඟක්
මොළයක් නැති සිරසක්
තෙතක් නැති හදවතක්... [More]
වෙසෙස්| ඇනා කැරනිනා සහ ඇනා ස්ටෙපානොව්නා

7-Mins

(ඩිල්ෂානි චතුරිකා දාබරේ) ලියෝ තෝල්ස්තෝයි විරචිත ඇනා කැරනිනා නවකතාවේ ප්‍රධාන කථා නායිකාව වන ඇනා අර්කෙඩියෙව්නා කැරනිනා නමැති චරිතය ගොඩනැංවීම සඳහා තෝල්ස්තොයිට කාන්තාවන් කිහිප... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook