Facebook
Twitter
Google+
YouTube
Blog
RSS Feed
අදහස් බූන්දි
බොදුබල සේනා ෆැසිස්ට්වාදය හිස එසැවීම
බූන්දි, 18:32:21
බොදුබල සේනාව ෆැසිස්ට් බලවේගයක් බව නොපෙනෙන්නේ, ෆැසිස්ට්වාදය යනු කුමක් දැ යි නොදන්නා කෙනාටත්, ෆැසිස්ට්වාදියාටත් පමණි. මේ දෙවැනුව කී ෆැසිස්ට්වාදියා එය නොදැකීම හෝ නොදකින බවක් ඇඟවීම පෙන්නුම් කරන හොඳම උදාහරණය, බොදුබල සේනා ‘ප‍්‍රතිපත්ති ප‍්‍රකාශනය’ යි. එහි සඳහන් පරිදි, ඔවුන් සකල ජාතිවාදයන්ට සහ පටු ආගම්වාදයට විරුද්ධ ලූ. එය, පතිවතක් ගැන කතා කරන ගණිකාවකගේ ‘සිල්වත්’ ප‍්‍රකාශයකට දෙවැනි නැත.

හිට්ලර්ගේ පක්ෂයේ මුල් නාමය වුණේ, ‘ජර්මන් කම්කරු පක්ෂය’ යි. කම්කරු පක්ෂයක් යැයි කී විට එය, ප‍්‍රගතිශීලී අර්ථයක් දනවයි. ඊට කලකට පසු ඔහු එම නාමය තවත් ‘ගෞරවාන්විත’ කෙළේය. ඒ මෙසේ ය: ‘ජාතික සමාජවාදී ජර්මානු කම්කරු පක්ෂය’ යනුවෙනි. දැන්, කලින් තිබූ කම්කරු පක්ෂයට ‘සමාජවාදී’ නාමයකුත් එක්ව ඇති බැවින් එයට තවත් ප‍්‍රගතිශීලී අරුතක් ආරූඪ කෙරේ. එහෙත්, ‘ජාතික’ සහ ‘ජර්මානු’ යන විශේෂණ පදත් ඇති නිසා, අර කී ‘සමාජවාදය’ සහ ‘කම්කරු’ අර්ථ දැන් විපර්යාසයකට පාත‍්‍ර වෙයි.

මේ සියලූ නම් හිට්ලර් තමන්ගේ පක්ෂයට එල්ලාගත්තේ, ඒ පිළිබඳව හොඳින් දැනුවත්ව ය. එහි තිබුණේ, ‘කම්කරු’ හෝ ‘සමාජවාදී’ යන්නෙන් සාමාන්‍යයෙන් අප දන්නා හඳුනන හරය පිළිබඳ ආශාවක් නොව, පෙර කී, ‘කම්කරු’ හා ‘සමාජවාදී’ යන වචනවල සපුරා ප‍්‍රතිවිරුද්ධය කරලියට ගැනීමේ අවශ්‍යතාවයි. මේ නිසා, අද බොදුබල සේනා ප‍්‍රකාශනය, තමන් ජාතිවාදී හෝ ආගම්වාදී නොවන බව කියන විට, එයින් අදහස් කරන්නේ අප අදහස් කරන දේ නොවන බව දත යුතුය.

ඊළඟට, ෆැසිස්ට්වාදයේ සැබෑ ස්වභාවය නොදන්නා පුහුදුන් ජනයාට හැඟෙන්නේ, මුස්ලිම් විරෝධී ව්‍යාපාරය මේ අවස්ථාවේ ඔවුන්ගේ ‘බෝ වීම’ යම් තාක් පාලනය කිරීම සඳහා යොදාගත හැකි සාධනීය මැදිහත් වීමක් වශයෙනි. ඊටම උඩගෙඩි දෙමින් මෑතක දී ආණ්ඩුවත් වන්ධ්‍යාකරණ සැත්කම් තහනම් කෙළේය. එවැනි සැත්කම් නිසා, ලංකාවේ සිංහල-බෞද්ධ ජනගහනය හැකිලී යතැ යි යන්න ඒ පසුපස පැවති තර්කණය විය. එනම්, ‘කුඩා පවුල’ මින් මතු සිංහල-බෞද්ධයාට ‘හරාම්’ බවයි.

ඒ නිසා, හලාල් ලේබලය ඉවත් කිරීම, පොදුවේ රටට සහ සමාජයට ලැබුණු ජයග‍්‍රහණයක් වශයෙන්, සාමාන්‍යයෙන් ජාතිවාදී නොවන සිංහලයන් පවා සිතූ බවක් පෙනෙන්ට තිබුණි. මධ්‍යස්ථ යැයි කියන ඇතැම් භික්ෂූන් වහන්සේලා පවා ගිය සතියේ, මේ අර්බුදයේ දී මුස්ලිම් ප‍්‍රජාව දැක්වූ ඉවසීම වෙනුවෙන් සිය ස්තුතිය පිරිනැමුවේ එබැවිනි. මෙහි දී මුස්ලිම් ජනයාගේ ඉවසීම අවශ්‍ය කෙළේ කුමක් ඉදිරියේ ද යන්න සහ එම දෙය, මුස්ලිම් ජාතිකයාගේ ඉවසීම නැති කරන දෙයක් විය හැකිව තිබුණේ කෙසේ ද යන්න සැළකිල්ලට ගැනුණු බවක් නොපෙනේ. මන්ද යත්, එය එසේ විණි නම්, මුස්ලිම් ජනයාට ඔවුන්ගේ ඉවසීම ගැන ස්තුති කරන අතරේම, බොදුබල සේනාවේ ප‍්‍රකෝපකාරීත්වය දෙසටත් විවේචනාත්මක ඇඟිල්ලක් දිගු විය යුතුව තිබුණු බැවිනි. එහෙත් එවැන්නක්, ආණ්ඩුවේ බලධාරීන්ගෙන්වත්, ‘ස්වාධීන’ යැයි කියාගන්නා බෞද්ධ භික්ෂූන්ගෙන්වත් අපට දකින්නට ලැබුණේ නැත. ඉතිං, අවසානයේ දී මෙය සමාජය අත්කරගත් ජයග‍්‍රහණයක් වශයෙන් අර්ථගන්වන විට, එම ජයග‍්‍රහණය ලබන ‘සමාජය’ වෙන දෙයක් නොව, බොදුබල සේනාවම බව කෙනෙකුට වැසැංගිය නොහැකි විය.

හොඳයි, හලාල් ලේබලය ඉල්ලා අස්කරගෙන ඇති නිසා ඉන් පසු ප‍්‍රශ්නය අවසන් විය යුතුව තිබුණි. එහෙත් මෙය ප‍්‍රශ්නයේ ආරම්භයක් පමණක් බව පෙන්නුම් කරමින්, එක් පැත්තකින් පිටරට පටවන භාණ්ඩවලට පමණක් හලාල් ලේබලය ලබා දීමත් තමන්ට සෑහීමකට පත්විය හැකි විසඳුමක් වශයෙන් භාර නොගන්නා මේ ෆැසිස්ට්වාදියෝ, අනිත් පැත්තෙන්, තම ප‍්‍රහාරයේ ඊළඟ වටය ද දැන් ප‍්‍රකාශයට පත්කරති. ඒ කුමක් ද? ලබන සතියේ සිට මහනුවරින් ඇරඹෙන්ට නියමිත තවත් බොදුබල සේනා රැස්වීමකින් පසු, මුස්ලිම් ගැහැනුන් හඳින විශේෂ ඇඳුමකට එරෙහි ව්‍යාපාරයක් ද දියත් කිරීමට කැසකැවීමයි. මේ සම්බන්ධයෙන් ජර්මානු පූජකවරයෙකු දෙවැනි ලෝක සංග‍්‍රාම සමයේ ජර්මනියේ තත්ත්වය ගැන ලියූ කවියක් රාවය පාඨකයා බොහෝ වර අසා ඇති නිසා මෙහි සඳහන් නොකරමි. කෙසේ වෙතත්, එයින් කියැවෙන්නේ, නොදැනුවත්කම, ෆැසිස්ට්වාදයේ අවාසනාවන්ත බිල්ලක් නොවී බේරෙන්නට මොනම ආරක්ෂණයක්වත් කිසිවෙකුට නොසපයන බවයි.







ඇස් දෙක පමණක් පිටතට පෙනෙන සේ ඇඳුම් ඇඳීමට යම් ගැහැනියකට සිදුවීම මේ ලියුම්කරු සලකන්නේ කාන්තා මර්දනයක් වශයෙනි. එසේම, කාන්තාවක් වේවා, පිරිමියෙකු වේවා, ආගමික නියමයක් මත ඇඳුම් තෝරා ගැනීම, එම පුද්ගලයා මත අභ්‍යාස කෙරෙන අනියම් මර්දනයකි. එවැනි මර්දනයක් පැනවිය හැක්කේ ඕනෑම ආගමක පූජ්‍ය පක්ෂයක් වෙනුවෙන් පමණි. උදාහරණයක් වශයෙන්, බෞද්ධ භික්ෂූන් සඳහා සිවුර හෝ කිතුණු පූජකවරුන් සඳහා ලෝගුව ආදී වශයෙනි.

ගිහි ඇඳුමක මූලික අරුත, නිරුවත ආවරණය කිරීමයි. පුද්ගල නිදහස උදුරා ගැනීමට නූතන සමාජයකට අයිතිය පැවරෙන්නේ ඒ මූලික කාරණය සම්බන්ධයෙන් පමණි. එනම්, නිරුවතින් මහපාරේ යාමට කිසිවෙකුට නූතන සමාජය අයිතියක් දෙන්නේ නැති බවයි. මෙසේ නිරුවත ආවරණය කිරීමේ මූලික ක‍්‍රියාවලිය තුළ (ඇඳුම තුළ) නිරාවරණය කර පෙන්වන දේවල් ද තිබේ. ඒවා, ප‍්‍රධාන වශයෙන් සංස්කෘතිය, ආගම, ජාතිකත්වය, දේශගුණය සහ සෞන්දර්ය ආදී සාධක යටතට ගැනේ. ඊයේ (13) කොළඹ කෞතුකාගාර ශ‍්‍රවණාගාරයේ පැවති පොතක් දොරට වැඞීමේ උත්සවයේ ප‍්‍රධාන ආරාධිතයෙකු වශයෙන් පැමිණි වැදි නායක ඌරුවරිගේ වන්නිල ඇත්තෝ, කරේ පොරවක් එල්ලාගෙන, උඩුකය නිරුවත්ව සම්භාවනීය සභාවට පැමිණීම, ‘ත‍්‍රස්තවාදී’ ක‍්‍රියාවක් වශයෙන්වත්, ‘අශීලාචාර’ කමක් වශයෙන්වත් කිසිවෙකු දුටුවේ නැත. එසේ පැමිණීමට ඔහුට සංස්කෘතිකමය අයිතියක් තිබුණි. ඔහු කරේ එල්ලාගෙන සිටි පොරොව, එම සභාවේ සිටි කිසිවෙකුට තර්ජනයට කාරණයක් නොවුණි.

ඒ ආකාරයෙන්, හින්දු භක්තිකයා වේට්ටිය හැඳීම, සිංහලයා සරම බැනියම හැඳීම, මුසල්මානුවා දිග කමිසය සහ ලෝගු කලිසම හැඳීම සහ යුරෝපීයයා කලිසම් කෝට් හැඳීම ඔවුන්ගේ සංස්කෘතිය කියාපායි. මේ එකක්වත් ඒ කිසි ජාතියකට හෝ ආගමකට අනිවාර්ය නැත. මුස්ලිම් පිරිමියාට අවශ්‍ය නම් යුරෝපීය ඇඳුමින් සැරසිය හැකිය. නැත්නම් සරම කමිසය හැඳිය හැකිය. එහෙත්, මුස්ලිම් ගැහැනියට ඒ අයිතිය නැත. ඇය, මුහුණ පමණක් නිරාවරණය කිරීමේ නිදහසේ සිට, ඇස් දෙක පමණක් නිරාවරණය කිරීමේ ‘නිදහස’ දක්වා බාල්දු කොට තිබේ.

එසේ කරන්නේ ඇයි? ඇගේ ශරීරය දැකීමෙන් පිරිමියා ඇවිස්සිය හැකි නිසා ය. ඒ නිසා, පිරිමියෙකුගේ ඇවිස්සීම වළක්වනු වස් ගැහැනියට ඇස් දෙක හැරුණු කොට සර්වාංගයම වසා ගැනීමට බලකෙරේ. තවත් විදිහකින් කිවහොත්, ඇගේ ශරීරය ආවරණය කළ යුතු ප‍්‍රමාණය පාලනය කරන්නේ පිරිමියෙකුගේ ආගමක් මගිනි.

මේ ආශ‍්‍රයෙන් ප‍්‍රශ්න ගණනාවක් පැනනගී. පිරිමියාගේ ලිංගිකත්වය ඇවිස්සීමට හේතු වන ගැහැනු සිරුරේ අංග කවරේ ද? ඇස් දෙක හැරුණු කොට මුළු සිරුරම වසාගන්නා ගැහැනුන් වෙසෙන සමාජයක, එම ගැහැනියගේ සිරුරේ සෑම මවිලක්ම පිරිමියා ඉදිරියේ ‘ලිංගිකව ප‍්‍රකෝපකාරී’ වෙති යි පිරිමියා විශ්වාස කරයි. දැන්, මේ විශ්වාසය බිහි වුණේ, මුස්ලිම් සමාජවල මිස බෞද්ධ, ක‍්‍රිස්තියානි හෝ හින්දු සමාජවල නොවේ. එහි අරුත වන්නේ, මෙතරම් පහසුවෙන් ලිංගිකව ඇවිස්සෙන පිරිමින් බිහිකර ඇත්තේ ද මුස්ලිම් සමාජයම වන බවයි. ඊට විසඳුමක් වශයෙන් ගැහැනියගේ ඇඳුම සකස් විය යුතු යැයි කීම සමාන කළ හැක්කේ, මෑතක දී ඉන්දියාවේ සමූහ දූෂණයට ලක්වූ තරුණියගෙන් එරට ඇමතිවරයෙකු ඇසූ ප‍්‍රශ්නයට ය. ‘මහ රෑ මොකට ද ගෑනියෙක් එළියට ගියේ?’

ඊළඟට, නූතන ලෝකයේ සෑම පුද්ගලයෙකුටම අනන්‍යතා පත‍්‍රයක් තිබිය යුතු බවට පිළිගැනීමක් තිබේ. එවිට, අර කී සර්වාංගය වැසූ ගැහැනියට නිකුත් කරන අනන්‍යතා පත‍්‍රයේ අරුතක් තිබිය හැකි ද? උදාහරණයක් වශයෙන්, එවැනි ගැහැනියක් කෙනෙකුට වෙඩි තබා පලායන්නේ යැයි සිතන්න. එම වෙඩි තැබීම ඇසින් දුටු කිසිවෙකුට පසු අවස්ථාවක ඇය හඳුනා ගැනීමට පිළිවන් කමක් ලැබේවි ද?

කොටින්ම, මට මුහුණ පෙන්වීම ප‍්‍රතික්ෂේප කරන කිසිවෙකුට මගේ මුහුණ දැකීමේ අයිතියක් තිබිය නොහැකිය.

නූතන ලෝකයට අයෝග්‍ය, මර්දනකාරී මෙවැනි සංස්කෘතික හෝ ආගමික පැනවීම් සහ බලහත්කාරී චාරිත‍්‍ර අභියෝග කළ යුත්තේ ලෞකික තලයක හේතුවාදීව මිස, බොදුබල සේනාව සේ එක ආගමක් කරේ තියාගෙන අනිත් ආගම ප‍්‍රශ්න කිරීමෙන් නොවේ. මේ කියන ඇඳුම පිළිබඳ බොදුබල සේනාවට අද ඇති ප‍්‍රශ්නය ඉහත දැක්වූ කිසි කරුණකට අදාළ නැත. එය අදාළ වන්නේ, සිංහල-බෞද්ධ ස්වෝත්තමවාදයටම පමණි. එම අන්තවාදය තුළ, බෞද්ධ ගැහැනියගේ ඇඳුමත් අනාගතයේ දී ප‍්‍රශ්න කෙරෙනු ඇත. ඩෙනිම් කලිසම ඈට තහනම් වී ඔසරිය හෝ ළමා සාරිය අනිවාර්ය කෙරෙන කාලය වැඩි ඈතක නැත.

මේ නිසා, මුස්ලිම් ගැහැනියගේ ඇඳුම පිළිබඳ ලෞකික ප‍්‍රශ්නය බොදුබල සේනාවේ ව්‍යාජ සටන් පාඨයක් කර ගැනීමට ඉඩ දිය යුතු නැත. ඇගේ නිදහස, සමාජ සංවර්ධනයත් සමග යම් දවසක ඇය දිනාගනු ඇත. එම ඇඳුම ඇය මත පැටවීමට මුස්ලිම් පිරිමියාට අයිතියක් නැති තරමටම, එම ඇඳුමෙන් ඇයව බලහත්කාරයෙන් ගලවා ගැනීමේ අයිතියක් කිසි අන්තවාදී ව්‍යාපාරයකට පැවරෙන්නේ ද නැත.





(-අවරදිග ආවර්ජනා. රාවය. 2013.03.16)
මේ වියමන ඔබේ මූණු පොතට එක් කරන්න-
Tags- Bodu Bala Sena, Sri Lankan Buddhists and Muslims, Racist, Hitler, Hijab
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
ගාමිණී වියන්ගොඩගෙන් තවත් වියමන්
පොත්
පොල්පොට්ගේ 'මාක්ස්වාදය' සහ කෙමරූජ් භීෂණය
අදහස්
සිංහල-බෞද්ධ හරක් මස් වෙනුවට බටහිර ක‍්‍රිස්තියානි හරක් මස් වැළඳීම
අදහස්
තණකොල සහ පුන්නක්කු
අදහස්
රජයේ නීතිපතිවරයෙකු වෙනුවට ආණ්ඩුවේ නීතිපතිවරයෙකු ආදේශ වීම
අදහස්
හලාල්, මොහිදින් බෙග් සහ ආගමික ව්‍යාප්තවාදය
තවත් අදහස් බූන්දි
To Sir, With Love!
විද්‍යාවේ සියවසක පිම්ම!
මරණ දඬුවම සහ සුළුතරයේ හෘද සාක්ෂිය!
කුණු වී දුඟඳ හමන මජර ජනමාධ්‍ය සංස්කෘතියට එරෙහිව කුමක් කරමුද?
දෙසියවෙනි උපන්දිනයට කාල් මාක්ස්ට උපහාර තෑග්ගක්!
BoondiLets
නිකෝස් කසන්සාකිස් කියයි.
සැබෑ ගුරුවරු නම් තම සිසුන් තරණය කළ යුතු යයි සිතන දේ හරහා යාමට තමන් ම පාලම් බවට හැරවෙන්නෝ ය. තරණයට උදව් කළ පසු සතුටින් බිඳ... [More]
What's New | අලුතෙන්ම
Cine| අසන්ධිමිත්තා- වෘත්තයෙන් ආපස්සට

3-Mins

(ඩිල්ෂානි චතුරිකා දාබරේ) සාහිත්‍යය හෝ සිනමාපට තවදුරටත් සාම්ප්‍රදායික ආකෘතියම නොපතයි. රසවිඳින්නන්ව සාමාන්‍ය කතාවකින් නළවාදැමීමට නොහැකිය. තවදුරටත් ඔවුහුද හුරුපුරුදු නිර්මාණ ස්වභාවයම නොපතති. නිර්මාණකරුවකු... [More]
Cine| රාමු තුළ යළි රාමු වුණු "දැකල පුරුදු කෙනෙක්"

6-Mins

(විකුම් ජිතේන්ද්‍ර) මේ යුගය ඡායාරූප හා කැමරා යුගයක් වන අතර වෘත්තීය හෝ අර්ධවෘත්තීය කැමරා භාවිත කරන ආධුනිකයා පවා අධි සුන්දරත්වයෙන් යුතු ඡායාරූප... [More]
අදහස්| To Sir, With Love!

2-Mins

(තාරක වරාපිටිය) To Sir With Love යනු මීට වසර 28 කට පමණ ඉහතදී කළු සුදු ටෙලිවිෂන් තිරයකින් මා බැලු චිත්‍රපටයකි. එය එතෙක්... [More]
වෙසෙස්| මැදියම් රැයේ වාහනවලට අතවනන සුදු හැඳි ගැහැනිය

5-Mins

(තිලක් සේනාසිංහ ) අද මෙන් මහජනයා හෝ රථවාහන බහුල නොවූ මීට දශක හය හතකට පෙර ඇතැම් දිනවල මැදියම් රැය ආසන්නයේ දී කොළඹ බොරැල්ලේ... [More]
ඔත්තු| හෙල්මලී ගුණතිලකගෙන් 'සහස් පියවර'

5-Secs

හෙල්මලී ගුණතිලක විසින් රචිත පළමු කෙටිකතා එකතුව වන 'සහස් පියවර' කෘතිය මුද්‍රණද්වාරයෙන් එළි දක්වා තිබේ.... [More]
පොත්| ඉණෙන් හැලෙන කලිසමක් රදවා ගන්න තතනමින්...

2-Mins

(රෝහණ පොතුලියැද්ද) පුද්ගල නාමයක්, වාසගමක් දුටු කල්හි ඔහුගේ ජාතිය/ ආගම/ කුලය/ ලිංගය/ ග්‍රාමීය, නාගරිකබව සිතියම් ගත කිරීම සාමාන්‍ය පුරුද්දක්. නමුත් "ඩොමිනික් චන්ද්‍රසාලි"... [More]
කෙටියෙන්| මොන එල්ලුං ගස් ද?

10-Secs

(සුරත්) කුඩුකාරයෝ ටික විජහට එල්ලාලා
බේරා ගනිමු රට ඒකයි හදිස්සිය
මෙත්පල් මැතිඳු මුර ගානා හැටි දැකලා
ගිරවා මගේ දුන්නා එල ටෝක් එකක්

"එල්ලිය යුතු එවුන් දා ගෙන රෙදි අස්සේ... [More]
පොත්| උමතු වාට්ටුවට අප්පචිචී ඇවිත්!

6-Mins

(කේ.ඩී. දර්ශන) 'උඹට එහෙම යන්න බැහැ උඹ ඉන්න ඕනෙ මම ළඟ. මගේ හෙවණැල්ලෙන් මිදෙන්න උඹට බැහැ.'
(-41 පිට)

'මම ගල් ගැහී අප්පච්චී දෙස බලාගෙන... [More]
රත්තරං ටික| මෙන්න බත් කූරෙක්!

28-Secs

මත්සුවා බැෂෝ යනු කෘතහස්ත ජපන් කවියෙකි. බැෂෝගෙ කවිකාර කම දැක දිනක් ඔහුගේ ශිෂ්‍යයෙකු ද කවියක්... [More]
කවි| ජානූ! පේ‍්‍රමයෙන් විතැන් විය හැකි දැයි මට කියන්න

24-Secs

(තුෂාරි ප්‍රියංගිකා) එකින් එක මතක අහුලමි
මංජුසාවකි හදවත මතක අහුරමි
සීත හිමයේ මිදුණු හිමකැටිති යට
ඔබට කවි ලියා සඟවමි
ජානූ!
පසුපස සෙවණැල්ල සේ ඇදෙමි... [More]
පොත්| සෞන්දර්යය වෙනුවට කටු අතු- අපේ යුගයේ උරුමය!

13-Mins

(චූලානන්ද සමරනායක) කිවිඳියකගෙ කාව්‍ය ග‍්‍රන්ථයක් එළිදක්වන මොහොතක ඇගේ කවියට ප‍්‍රවේශ වෙන්න වඩාම සුදුසු මාවත මොකක්ද? මේක ටිකක් විසඳගන්න අමාරු ප‍්‍රශ්ණයක්. මොකද අද... [More]
ඔත්තු| 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්'- දෙසැ. 01

11-Secs

මාලතී කල්පනා ඇම්බ්‍රෝස්ගේ 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්' කාව්‍ය... [More]
වෙසෙස්| වාලම්පුරි- වාසනාව, විහිළුව සහ මිත්‍යාව

1-Mins

(තාරක වරාපිටිය) ලංකාවේ ඉහළ "අලෙවි වටිනාකමක්" ඇති, ‘අනුහස් ඇති’ ගුප්ත වස්තුවකි වාලම්පුරිය. මෙම ‘වටිනාකම’ තීරණය වන්නේ එහි ඇති ද්‍රව්‍යමය වටිනාකම හෝ වෙනත්... [More]
පොත්| "මතක වන්නිය" හෙවත් උතුරේ ශේෂ පත්‍රය

3-Mins

(සුරෝෂන ඉරංග) කලා කෘතියකින් භාවමය කම්පනයක් ඇතිකළ හැකි නම් එයට කිසියම් සමාජ බලපෑමක් සිදුකළ හැකිය. එසේ කම්පනයත්, පශ්චාත්තාපයත් ජනිත කළ, දමිළ බසින්... [More]
අදහස්| විද්‍යාවේ සියවසක පිම්ම!

2-Mins

(තාරක වරාපිටිය) පසුගිය සියවසේ මිනිස් ශිෂ්ඨාචාරය මුහුණපෑ ප්‍රධාන මාරක අභියෝග තුන වුයේ වසංගත, සාගත හා සංග්‍රාමයන්ය. ඒ සියවස තුල එසේ ඉන් මියැදුන... [More]
කරන්ට්ස්| "අඟ"

19-Secs

(උපුල් සේනාධීරිගේ) අංඟ පුලාවකට නැති මිනිස්සු
තම හිස අත ගෑහ
අඟක්... ඔව් අඟක්
රයිනෝසිරසක හැඩගත් අඟක්
මොළයක් නැති සිරසක්
තෙතක් නැති හදවතක්... [More]
වෙසෙස්| ඇනා කැරනිනා සහ ඇනා ස්ටෙපානොව්නා

7-Mins

(ඩිල්ෂානි චතුරිකා දාබරේ) ලියෝ තෝල්ස්තෝයි විරචිත ඇනා කැරනිනා නවකතාවේ ප්‍රධාන කථා නායිකාව වන ඇනා අර්කෙඩියෙව්නා කැරනිනා නමැති චරිතය ගොඩනැංවීම සඳහා තෝල්ස්තොයිට කාන්තාවන් කිහිප... [More]
පරිවර්තන| යෑම සහ ඒම අතර

20-Secs

(ඔක්තාවියෝ පාස් | නිලූක කදුරුගමුව) තම විනිවිද පෙනෙනබව සමඟ
ආලයෙන් බැඳුණු දහවල
අවිනිශ්චිතව ටැග්ගැහෙයි
යෑම සහ නැවතීම අතරමැද.
මුළු ලෝකයම නිසලව නැලැවෙන
මුහුදු බොක්කකිය දැන් වටකුරු පස්වරුව.... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook