Facebook
Twitter
Google+
YouTube
Blog
RSS Feed
Cine බූන්දි
සම්මානනීය වෙන්වීමක් [A Separation] චිත්‍රපටය සහ ඉරාන ජනතාවගේ මනුශ්‍යත්වය
බූන්දි, 17:01:55
[ඉරානය තුල දීත් ඉන් පිටත දීත් මේ චිත්‍රපටය අවස්ථා රැසක දී සම්මානයට පාත්‍ර විය. ඉන් කීපයක් පමණක් සඳහන් කරතොත්, 2011 බර්ලින් ජාත්‍යන්තර සිනමා උලෙලේ දී එය හොඳ ම චිත්‍රපටය ලෙස රන් වලසා සම්මානයෙන් පිදුනු අතර හොඳ ම නලුවාට සහ නිලියට හිමි රිදී වලසා සම්මානද්වය ද හිමි කර ගති. අමෙරිකානු ඇකඩමි (ඔස්කාර්) සම්මාන උලෙලේ දීත් බ්‍රිතාන්‍යයේ ස්වාධීන සිනමා උලෙලේ දීත් ඩබ්ලින්, වැන්කුවර් හා ඩෙන්වර් ජාත්‍යන්තර සිනමා උලෙලෙවල (සිනමා විචාරක කවයන්හි ත්‍යාගය) දීත් එය වසරේ හොඳ ම විදේශ චිත්‍රපටය ලෙස සම්මාන ලැබී ය. ඩර්බන් ජාත්‍යන්තර සිනමා උලෙලේ දී හොඳ ම චිත්‍රපටය හා තිර රචනාව ලෙසත් මෙල්බර්න් ජාත්‍යන්තර සිනමා උලෙලේ දී ජනප්‍රියතම විශේශාංග චිත්‍රපටය ලෙසත් ශාන්ත පීටර්ස්බර්ග් ජාත්‍යන්තර සිනමා උලෙලේ දී හොඳ ම චිත්‍රපටය (ග්‍රෑන්ඩ් ප්‍රික්ස් සම්මානය) ලෙසත් එය තෝරා ගැනින. හොංකොංහි ආසියානු සිනමා සම්මාන උලෙලේ දී හොඳ ම අධ්‍යක්ශ, තිර රචක හා සංස්කාරක යන ත්‍යාග ත්‍රිත්වය ඊට හිමි විය - පරිවර්තක. ]

චිත්‍රපටයක් නැතහොත් යම් කලාකෘතියක් වෙනුවෙන් අප අපේ ඉදිරි දර්ශන කොලම කැප කරතොත් ඒ ඉතා කලාතුරෙකිනි. එසේවතුදු, ඉරාන සිනමාකරු අස්ඝර් ෆර්හාඩිගේ වෙන්වීමක් ("A Separation", 2011) චිත්‍රපටය, එය බිහි වන සන්දර්භයත් ඊට ම ආවේනික කුසලතාත් අතර පවතින සුසංයෝගය කරනකොටගෙන මෙයාකාරයෙන් බාර ගනු වටී. කීමට බොහෝ දෑ ඇති එම කලාකෘතියට, වර්තමාන තත්වය විසින් තියුනු හෘදයංගම බවක් හා සුවිශේශ අදාලත්වයක් පැවරී ඇත.

එක්සත් ජනපද ආන්ඩුව
හා එහි මිලිටරි ඔත්තු සේවා හස්තය, ඊශ්‍රායල තන්ත්‍රයේත් එහි යුරෝපීය මිතුරන්ගේත් අනුදැනුම ඇතිව ඉරානයට එරෙහි හමුදා ක්‍රියාමාර්ගයක් දෙසට දයාවිරහිතව ගමන් කරමින් සිටී. මෙහි පූර්ව- නිමිත්ත ඉරාන න්‍යශ්ටික වැඩපිලිවෙල යි.

එබඳු යුද්ධයක අර්ථය, ඉරාන ජනගහනයට සහ කලාපීය ජනතාවන්ට කිව නොහැකි තරම් දුක්පීඩා උරුම වීමකි. එය, ඊශ්‍රායල වැසියන්, අමෙරිකානුන් හා යුරෝපීයයන් හට ද බලපාන්නා වූ පෘථීවි ගෝලීය පරිමාන ව්‍යසනකාරී විපාක උද්ගත වීමෙහි විභවයකින් ද යුක්ත වනු ඇත.

ජනාධිපති බැරැක් ඔබාමා, රාජ්‍ය ලේකම් හිලරි ක්ලින්ටන් හා ආරක්ශක ලේකම් ලියොන් පැනේටා ඉරානයේ න්‍යශ්ටික අභිප්‍රායයන් පිලිබඳව පදනම් විරහිත ප්‍රකාශ ක්‍රියාකාරී යන්ත්‍ර මෙන් විධිමත්ව නිකුත් කරනුයේ, හරියට, 2003 මාර්තු ඉරාක ආක්‍රමනයට ගැම්ම ගැනීමෙහිලා එක්සත් ජනපද ආන්ඩුව හා ජනමාධ්‍ය මගින් පතුරුවා හල "සමූහ නාශක අවි" පිලිබඳ ගනන් නැති බොරු ප්‍රචාර ගැන අපට අත්දැකීමක් නැතුවා මෙනි.

එම සංත්‍රාසමය අත්දැකීම, වඩා විනාශකාරී පරිමානයෙන්, ඉරානය තුල දී ලෝකයා නැවත වරක් අත්විඳිනු ඇති ද?

ඉරානයේ දුශ්ට ක්‍රියා පිලිබඳ ප්‍රවෘත්ති වාර්තා නමැති ගිනි බෝම්බ දිනපතා ම පාහේ අමෙරිකානුන් මත හෙලනු ලැබේ: එක්සත් ජනපදයට හා ඊශ්‍රායලයට එරෙහි එහි "තර්ජන", එය ත්‍රස්තවාදයට දෙන සහයෝගය, එහි ප්‍රචන්ඩකාරී භූ- දේශපාලනික අභිප්‍රායයන් යනාදිය. ඉරාන ජනතාව මත්, ඔවුන් සිය ප්‍රචාරක කාර්යයන්ට සේවය කරන අවස්ථාවන්හි දී හැර - නිදසුනක් ලෙස, ඉහල මධ්‍යම පන්තික හරිත විපාර්ශ්ව ව්‍යාපාරය ගැන පවසන විට හැර, පින්තාරු කෙරෙනුයේ ආගමික ධර්මෝන්මාදයෙන් හා අමෙරිකානුන් කෙරෙහි අහේතුක වෛරයෙන් කුලප්පු වූ ආගන්තුක, එදිරිවාදී, නොමිනිස් සත්ව කොට්ඨාශයක් ලෙසිනි.

වෙන්වීමක්
චිත්‍රපටය, ඉරාන ජීවිතයෙහි සැබෑ තතු අමෙරිකානුන්ට හා සෙසු බටහිර වාසීන්ට මුනගස්වන විරල අවස්ථාවකි. අමෙරිකානු සිනමා කර්මාන්තයේ බොහෝ නිපැයුම් මෙන් නොව, මේ චිත්‍රපටය සෘජු ය, අව්‍යාජ ය. නිව් රිපබ්ලික් පුවත්පතේ සිනමා විචාරකයා හට, ෆර්හාඩිගේ කෘතිය සමඟ සසඳන විට, එම පොදු කතා වස්තුව ම විශය කොට ගත් අමෙරිකානු චිත්‍රපට "බොල්, සෝබන හා ධන ප්‍රදර්ශනකාමී" ඒවා යයි පිලිගැනීමට බල කෙරුනි.

වෙන්වීමක් හි කේන්ද්‍රීය ගැටලු ගැඹුරින් ම මානුශික ය, තරයේ විශ්වසනීය ය. ටෙහෙරානයේ මධ්‍යම පන්තික අඹුසැමි යුවලක් දික්කසාදය අද්දර සිටිත්. සිය දියනිය ද කැටුව ඉරානයෙන් පිටවීමට බිරිඳ වන සිමින්ට වුවමනා වී ඇත. අල්සයිමර් රෝගයෙන් (අකලට මහලුව ස්මරන ශක්තිය දුර්වල වීම - පරි.) පෙලෙන සිය පියාට ඇප උපස්ථාන කරමින් රට තුල ම රැඳී සිටීමට සැමියා වන නඩාර්ට බල කෙරී ඇත. පියා දැන් තම පුතා කවරෙකු ද කියාවත් නොදන්නා බව සිමින් පවසන විට නඩාර් පිලිතුරු දෙනුයේ "ඒත්, මම දන්නවා ඒ මගේ තාත්තා බව!" යනුවෙනි.



බිරිඳ සිය මව සමඟ විසීමට පිටත්ව යන විට, නඩාර් පියාගේ සාත්තුව පිනිස රාසෙයි නමැති කම්කරු පන්තික ස්ත්‍රියක මෙහෙකාර සේවයෙහි යොදවයි. රාසෙයි ගර්භනියකි. රැකියා විරහිතව සිටින ඇගේ සැමියා හොජැට් පසුපස නයකරුවෝ ලුහු බඳිත්. ස්වකීය සෞඛ්‍ය තත්වය හදිසියේ අයහපත් වීම නිසා වැඩ දිනය අතරතුර දී ම වෛද්‍යවරයෙකු හමු වීමට බල කෙරෙන රාසෙයි, ඔල්මාදයෙන් පෙලෙන මහල්ලා ඔහුගේ ඇඳ විට්ටමට බැඳ තබා පිටව යයි. නිවෙස වෙත එන නඩාර් තම පියාගේ එම ශෝචනීය ඉරියව්ව දැක කුපිත වෙයි. පෙරලා පැමිනි රාසෙයි සමඟ හබයක පැටලෙන ඔහු ඇය නිවෙසින් දොට්ට දමයි. අනතුරුව, අප දකින පරිදි, රෝහල්ගත වන රාසෙයි මල දරුවෙකු ප්‍රසූත කරන්නී ය. පඩිපෙලින් පහලට ඇද දැමීමෙන් කුස ඔත් බිලිඳාගේ ජීවිතය විනාශ කලේ යයි රාසෙයි සහ ඇගේ සැමියා නඩාර්ට චෝදනා කරත්.

කථාව දිගහැරෙන විට, ලමුන් ද ඇතුලුව හැම චරිතයක් ම දැරිය නොහැකි තරම් පීඩාවන්ගෙන් පෙලෙන්ට පටන් ගනී. වෙනස් විය යුතු දෑ වෙනස් කල විට, මේ නාටකය ම බොහෝ අමෙරිකානු පුරවර හා නගර ද ඇතුලු ගනන් නැති වෙනත් ස්ථානයන්හි රූගත කල හැකි ය.

වෙන්වීමක්, තීව්‍රතර ප්‍රතිවිරෝධතාවන්ගෙන් ගහන ඉරාන සමාජය පිලිබඳ චාටු බසින් තොර, යථාර්ථවාදී පින්තූරයකි. සියලු ජන කොට්ඨාශ අරබයා එය අවංක ය. ඒ අතර, හැම කේන්ද්‍රීය භූමිකාවක් ම ; එකිනෙකට පටහැනි ප්‍රකාශ ගැන තීන්දු දීමට සිදු වන මහේස්ත්‍රාත්වරයා පවා සාධාරනවත් සානුකම්පිතවත් සැලකුම් ලබා ඇත. වරදකාරී බව හෝ නිර්දෝශී බව පිලිබඳව ඒ ඒ චරිතය තුල පවත්නා පුද්ගලික හැඟීමෙහි තරාතිරම් කෙමෙන් පසුබිමට මැකී යන අතර ඛෙදයෙහි අවසන් වගකීම පැහැදිලිව ම ප්‍රගාඪ සමාජාර්ථීක ආතතීන් මත පැටවෙයි. කෙලවර, අන් තැනෙක දී මෙන් ම, වඩා ධනවත් යුවල තමන් අත ම වාසිය රඳවා ගනී.

වෙන්වීමක් හි රඟපෑම් "අනර්ඝ ය" කිව යුතු දොසක් ඇත්තේ ම නැති තරම් ය. ෆර්හාඩිගේ චිත්‍රපටය, මෑත දශකයන්හි අත්‍යන්තයෙන් මානුශීය ඉරාන සිනමා සම්ප්‍රදාය තුල ඉහලින් වැජඹෙන අතර එය අබ්බාස් කියරොස්තාමිගේ "මිතුරාගේ නිවහන කොහි ද?" (Where is the Friend’s Home?) , සමීප රූපය (Close-Up) හා ඔලිව් රුප්පාව අතරින් (Through the Olive Trees) , ජෆාර් පනාහිගේ සුදු බැලුම (The White Balloon) හා කැඩපත (The Mirror) සහ වෙනත් කෘති ගනනාවක් සමඟ එක පෙලට සිටී.

වෙන්වීමක් චිත්‍රපටය නරඹන සහෘදයා හමුවේ අනාවරනය වනුයේ සංකීර්න වූත් බෙහෙවින් ප්‍රබුද්ධ වූත් සමාජයකි. එහි දෛනික ජීවිතය, සෘජුව ම කියතොත්, වත්මන් එක්සත් ජනපදය තුල පවතිනවාට වඩා ශිශ්ට මං ඔස්සේ ඇදී යයි.

විදේශික පීඩනය පිලිබඳ දීර්ඝ, බිහිසුනු ඉතිහාසයක් සහිත රටකි, ඉරානය. 1953 දී, ප්‍රජාතන්තවාදී ලෙස බලයට පත් ඉරාන ආන්ඩුවට එරෙහිව අමෙරිකාව හා බ්‍රිතාන්‍යය විසින් කුමන්ත්‍රනයක් සංවිධානය කෙරින. ඒ අනුව ස්ථාපිත දුර්දාන්ත ශා [මොහොමඩ් රේසා පාලවි - පරි.] රාජ තන්ත්‍රය, 1979 දී බලයෙන් පහ කෙරෙන තෙක් ම බටහිර තෙල් සමාගම්වල ඕනෑ එපාකම් ආරක්ශා කලේ ය.

"අමෙරිකානු ජනතාවගේ"
නාමයෙන්, එක් හෝ තවත් පාරදෘශ්‍ය මුසාවාදයක් මත පදනම් වෙමින් ඉරානයට එරෙහි යුද්ධයක් ඉක්මනින් දියත් කෙරෙනු ඇති ද?



වෙන්වීමක් චිත්‍රපටයෙහි අප දකින වීදි, ගොඩනැගිලි හා මනුශ්‍ය ජීවිත මත අමෙරිකානු මාරක බෝම්බ හා මිසයිල වරුසා ඉක්මනින් කඩාපාත් වෙයි ද? ඔබාමා, කැමරන්, සාර්කෝසි හා නෙතන්යාහුගෙන් සැදුම් ලත් අපරාධ රැහැන එහි මාවත පාදා ගනී ද? සිතා ගැනුම පවා දුශ්කර වුව කටුක යථාර්ථය එය යි. පූර්න පරිමාන යුද්ධයකින් මෙපිට වුව, ආර්ථීක සම්බාධක හා සෙසු ක්‍රියාමාර්ග මගින් ඉරාන ජීවිතය අහුරනු ලැබ තිබෙන අතර වෙන්වීමක් තුල නිරූපිත පරිපීඩනයන් මෝදු වීමෙහිලා ඒවා ඉවහල් වී ඇති බවට සැක නැත.

මේ ඇයි ද? එමගින්, මැදපෙරදිග බලශක්ති සැපයුම වෙත තමන්ට වැඩිතර යොමුවක් පාදා ගැනුමටත් ඒ සඳහා බාධකයක්ව ඇතැයි ඔවුන් සලකන පාලන තන්ත්‍රයක් අතුගා දැමීමටත් එක්සත් ජනපදයට හා එය පසුපස ඇදෙන කැනහිලුන්ට හැකි වන බැවිනි.

අමෙරිකානු මාධ්‍ය
, උද්ගතව ඇති තත්වය පිලිබඳ විකෘත චිත්‍රයක් මවාපාමින් මහජනතාවන් අවිචාරය කරා කැඳවාගෙන යමින් සිටී. නිදසුනක් ලෙස, ගිනිය නොහැකි සංඛ්‍යාවක ඉරාක ජනයාගේ රුධිරය දැනට ම තම දෑත්වල තවරාගෙන සිටින සංස්කාරක මඬුල්ලකින් යුත් නිව්යෝර්ක් ටයිම්ස් පත්‍රය පසුගිය මාර්තු 28 දින එක්තරා ලිපියක් පල කලේ, ඔවුන්ගේ ලියවිලි හා ප්‍රකාශන තුල ඔත්තු සේවාවක් මගින් මෙහෙයවෙන මදාවිකමක් ගැබ්ව ඇතැයි යමෙකුට හැඟී යන පරිද්දෙනි. මේ පුවත්පත, පෙන්ටගනයෙහි හා සීඅයිඒ සංවිධානයෙහි ප්‍රචාරක හස්තය හැටියට අඩුවැඩි වශයෙන් "ස්වයංක්‍රීය ගුවන් නියමුවෙකු" මෙන් ක්‍රියාත්මක වන බැවින් දෙන ලද මොහොතක ලියැවෙන ලිපියක් එවැන්නක් ද නැද්ද යන්න නිශ්චිතව ම පැවසීම උගහට ය.

අදාල මාර්තු 28 දින ලිපිය, ඊශ්‍රායල අගමැති බෙන්ජමින් නෙතන්යාහු සහ ආරක්ශක ඇමති එහුඩ් බරක් අතර සමීප සබඳතාව පෙලගස්වමින් ඔවුන් ඉරාන යුද්ධය සැලසුම් කරන අයුරු පහදයි:"නෙතන්යාහු මහතාට අනුව," අපට වැටහෙනුයේ, "ඉරාන න්‍යශ්ටික අවියක් නාසි යුද යන්ත්‍රයේ සහ ස්පාඤ්ඤ ධර්මාධිකරනයේ 21වෙනි සියවස් තුල්‍යය වනු ඇති බව යි." ඓතිහාසික නොතකා හැරීම සහ දූශිත සදාචාරය මෙහි දී නව- විජිතවාදී උද්ධච්ඡකම සමඟ හාද වී ඇත.

කලාපය තුල දැනට ම න්‍යශ්ටික අවිවලින් සන්නද්ධව සිටින එක ම බලය ඊශ්‍රායලය බවත් එය දශක ගනනාවක් මුලුල්ලේ පලස්තීනුවන්ට හා සෙසු අරාබි ජනයාට එරෙහිව ප්‍රචන්ඩ වූත් මාරක වූත් ප්‍රතිපත්ති ක්‍රියාවට නැගෙන බවත් ටයිම්ස් වාර්තාකරුට ගැටලු උපදවන කාරනා නොවේ.



ඉරානයට එරෙහි ප්‍රහාරයක් "නස්පැත්තියක්" නිර්මානය කරයි ද? නෙතන්යාහුගේ සහ බරක්ගේ අදහස් උපුටා දක්වන ටයිම්ස් පත්‍රය එවැන්නකට ඇති ඉඩකඩ නිශ්ප්‍රභ කරයි. යුදකාමී ඊශ්‍රායල නායකයන් තර්ක කරන පරිදි, "න්‍යශ්ටික අවි සහිත ඉරානයක් ද, න්‍යශ්ටික බලය වෙත ගමන් කිරීමට පෙර එරටට එල්ල කෙරෙන ප්‍රහාරයකින් සිදු විය හැකි හානිය ද යන තෝරා ගැනීම දෙන ලද කල්හි මේ දෙවැන්නට මනාප වීම වඩා යෝග්‍ය ය. ප්‍රති- ප්‍රහාරයක් එල්ල වෙතැයි ද ඔවුහු කියති; මිනිස් ජීවිත අහිමි වනු ඇති අතර දේපල විනාශ වනු ඇත. එහෙත්, මේ අතරින් අඩු නපුර අපරොක්තය බව ඔවුහු කියා සිටිති." යම් හෙයකින්, ඉරානය ප්‍රති- ප්‍රහාර එල්ල කල හොත් ඊශ්‍රායලයෙහි "ආරක්ශාව" සඳහා ඉදිරිපත් වීමට තමන්ට වගකීමක් ඇති බව තොල් මතුරමින් එක්සත් ජනපදය තමන්ගේ ම ප්‍රහාරයක් දියත් කරනු ඇත.

මේ සියල්ලෝ ඔබාමා තන්ත්‍රය හා ක්‍රොංග්‍රසය, ඊශ්‍රායල රජය සහ එක්සත් ජනපද මාධ්‍ය මොන තරම් සාහසික අපරාධකරුවෝ ද!

එක්සත් ජනපදය තුල වෙන්වීමක් නැරඹූයේ සාපේක්ශ වශයෙන් සුලු පිරිසකි ; ලක්ශ කීපයකි. තවත් මිලියනයක් පමන ප්‍රංශයේ දීත් ඊට අඩු පිරිසක් එක්සත් රාජධානියේ දීත් එය නැරඹූහ. මේ රාජ්‍යයන්හි ආන්ඩු කලාපීය බලයක් ලෙස සලකා ඉරානය විනාශ කිරීමට සැලසුම් කරමින් සිටී. ඒ වනාහි මෙතෙක් වර්ධනය කෙරී පවතින ඉතා ම බලගතු මාරක ආයුධ මගින් ඉරාන ජනගහනයට දෙනු ලබන දඬුවමක් ඉල්ලා සිටින්නා වූ කාර්යභාරයකි.





අමෙරිකානුන් ද යුරෝපීයයන් ද මේ චිත්‍රපටය නැරඹිය යුතුව ඇත. ඇකඩමි සම්මානය බාර ගනිමින් ෆර්හාඩි එය ඉරාන ජනතාව වෙත පිරිනැමුවේ ඒ වනාහි "සියලු සංස්කෘතීන්ට හා සභ්‍යත්වයන්ට ගරු කරන, එදිරිවාදුකම් හා අමනාපකම් පහත් කොට සලකන ජනතාවකි" යනුවෙන් පවසමිනි. ඉරානය සමඟ යුද වැදීමට කෙරෙන තර්ජනයන්ට එරෙහිව සාමූහික විරෝධතාවක් ගොඩනැගිය යුතු ය. මිනිසුන්ගේ ඇස් පනාපිට සිදු කිරීමට සූදානම් වන මේ මහා අපරාධය නැවැත්වීමට හැකි හැම දෙයක් ම කල යුතුව තිබේ.

2012 මාර්තු 30
-ලෝක සමාජවාදී වෙබ් අඩවිය

[අක්ශර වින්‍යාසය පරිවර්තකගේ අභිමතය පරිදි ය. ]
මේ වියමන ඔබේ මූණු පොතට එක් කරන්න-
Tags- Asghar Farhadi, Berlin International Film Festival, Golden Bear Award, Silver Bear Award, Oscar Awards, Durban International Film Festival, Denver International Film Festival, St. Peters-berg International Film Festival,Barack Obama, Hillery Clinton, Leon Paneta, Invading Iraq, United States of America, Massacre Weapons, New Republic News Paper, Iranian Civilians and Culture, Abbas Kiarostami , Jafar Panahi, American Public, Nicolas Sarkozy, Benjamin Netanyahu, New york Times,Nazi war, Iranian weapons of mass destruction ,Israel-Palestine War, American Congress, Great Britain, World Socialist Web
Plus
ප්‍රතිචාර
අඩවි දත්ත
Facebook Page
Boondi Google+
Boondi RSS
ඩේවිඩ් වෝල්ෂ් ගෙන් තවත් වියමන්
වෙසෙස්
බැස ගිය සුපිරි තරුව
Cine
මෙවර ඔස්කාර් සම්මාන උළෙළ තුච්ඡබවේ සංදර්ශනයකි!
තවත් Cine බූන්දි
අසන්ධිමිත්තා- වෘත්තයෙන් ආපස්සට
රාමු තුළ යළි රාමු වුණු "දැකල පුරුදු කෙනෙක්"
ස්ත්‍රී සිත් පෙන්වන වෛෂ්ණාවී පිළිබඳ පසු විපරමක්
Gifted Hands: The Ben Carson Story- මිනිස් බව නිර්මාණය කළ හැක්කේ මිනිසුන්ටම පමණි!
ලෙස්ටර්- සිනමා අඹරේ මැකී ගිය රිදී රේඛාව
BoondiLets
ඇල්ෆ්‍රඩ් හිච්කොක් කියයි.
සිනමා පටයක "දිග" යනු, මිනිස් මුත්‍රාශයේ දරා සිටීමේ හැකියාව සමග සෘජු ලෙස සම්බන්ධ කොට සැලකිය යුත්තකි!
What's New | අලුතෙන්ම
Cine| අසන්ධිමිත්තා- වෘත්තයෙන් ආපස්සට

3-Mins

(ඩිල්ෂානි චතුරිකා දාබරේ) සාහිත්‍යය හෝ සිනමාපට තවදුරටත් සාම්ප්‍රදායික ආකෘතියම නොපතයි. රසවිඳින්නන්ව සාමාන්‍ය කතාවකින් නළවාදැමීමට නොහැකිය. තවදුරටත් ඔවුහුද හුරුපුරුදු නිර්මාණ ස්වභාවයම නොපතති. නිර්මාණකරුවකු... [More]
Cine| රාමු තුළ යළි රාමු වුණු "දැකල පුරුදු කෙනෙක්"

6-Mins

(විකුම් ජිතේන්ද්‍ර) මේ යුගය ඡායාරූප හා කැමරා යුගයක් වන අතර වෘත්තීය හෝ අර්ධවෘත්තීය කැමරා භාවිත කරන ආධුනිකයා පවා අධි සුන්දරත්වයෙන් යුතු ඡායාරූප... [More]
අදහස්| To Sir, With Love!

2-Mins

(තාරක වරාපිටිය) To Sir With Love යනු මීට වසර 28 කට පමණ ඉහතදී කළු සුදු ටෙලිවිෂන් තිරයකින් මා බැලු චිත්‍රපටයකි. එය එතෙක්... [More]
වෙසෙස්| මැදියම් රැයේ වාහනවලට අතවනන සුදු හැඳි ගැහැනිය

5-Mins

(තිලක් සේනාසිංහ ) අද මෙන් මහජනයා හෝ රථවාහන බහුල නොවූ මීට දශක හය හතකට පෙර ඇතැම් දිනවල මැදියම් රැය ආසන්නයේ දී කොළඹ බොරැල්ලේ... [More]
ඔත්තු| හෙල්මලී ගුණතිලකගෙන් 'සහස් පියවර'

5-Secs

හෙල්මලී ගුණතිලක විසින් රචිත පළමු කෙටිකතා එකතුව වන 'සහස් පියවර' කෘතිය මුද්‍රණද්වාරයෙන් එළි දක්වා තිබේ.... [More]
පොත්| ඉණෙන් හැලෙන කලිසමක් රදවා ගන්න තතනමින්...

2-Mins

(රෝහණ පොතුලියැද්ද) පුද්ගල නාමයක්, වාසගමක් දුටු කල්හි ඔහුගේ ජාතිය/ ආගම/ කුලය/ ලිංගය/ ග්‍රාමීය, නාගරිකබව සිතියම් ගත කිරීම සාමාන්‍ය පුරුද්දක්. නමුත් "ඩොමිනික් චන්ද්‍රසාලි"... [More]
කෙටියෙන්| මොන එල්ලුං ගස් ද?

10-Secs

(සුරත්) කුඩුකාරයෝ ටික විජහට එල්ලාලා
බේරා ගනිමු රට ඒකයි හදිස්සිය
මෙත්පල් මැතිඳු මුර ගානා හැටි දැකලා
ගිරවා මගේ දුන්නා එල ටෝක් එකක්

"එල්ලිය යුතු එවුන් දා ගෙන රෙදි අස්සේ... [More]
පොත්| උමතු වාට්ටුවට අප්පචිචී ඇවිත්!

6-Mins

(කේ.ඩී. දර්ශන) 'උඹට එහෙම යන්න බැහැ උඹ ඉන්න ඕනෙ මම ළඟ. මගේ හෙවණැල්ලෙන් මිදෙන්න උඹට බැහැ.'
(-41 පිට)

'මම ගල් ගැහී අප්පච්චී දෙස බලාගෙන... [More]
රත්තරං ටික| මෙන්න බත් කූරෙක්!

28-Secs

මත්සුවා බැෂෝ යනු කෘතහස්ත ජපන් කවියෙකි. බැෂෝගෙ කවිකාර කම දැක දිනක් ඔහුගේ ශිෂ්‍යයෙකු ද කවියක්... [More]
කවි| ජානූ! පේ‍්‍රමයෙන් විතැන් විය හැකි දැයි මට කියන්න

24-Secs

(තුෂාරි ප්‍රියංගිකා) එකින් එක මතක අහුලමි
මංජුසාවකි හදවත මතක අහුරමි
සීත හිමයේ මිදුණු හිමකැටිති යට
ඔබට කවි ලියා සඟවමි
ජානූ!
පසුපස සෙවණැල්ල සේ ඇදෙමි... [More]
පොත්| සෞන්දර්යය වෙනුවට කටු අතු- අපේ යුගයේ උරුමය!

13-Mins

(චූලානන්ද සමරනායක) කිවිඳියකගෙ කාව්‍ය ග‍්‍රන්ථයක් එළිදක්වන මොහොතක ඇගේ කවියට ප‍්‍රවේශ වෙන්න වඩාම සුදුසු මාවත මොකක්ද? මේක ටිකක් විසඳගන්න අමාරු ප‍්‍රශ්ණයක්. මොකද අද... [More]
ඔත්තු| 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්'- දෙසැ. 01

11-Secs

මාලතී කල්පනා ඇම්බ්‍රෝස්ගේ 'නො පවතිනු වස් ප්‍රේමය ව පවතිමි' සහ 'පියා නො හැඹූ පියාපත්' කාව්‍ය... [More]
වෙසෙස්| වාලම්පුරි- වාසනාව, විහිළුව සහ මිත්‍යාව

1-Mins

(තාරක වරාපිටිය) ලංකාවේ ඉහළ "අලෙවි වටිනාකමක්" ඇති, ‘අනුහස් ඇති’ ගුප්ත වස්තුවකි වාලම්පුරිය. මෙම ‘වටිනාකම’ තීරණය වන්නේ එහි ඇති ද්‍රව්‍යමය වටිනාකම හෝ වෙනත්... [More]
පොත්| "මතක වන්නිය" හෙවත් උතුරේ ශේෂ පත්‍රය

3-Mins

(සුරෝෂන ඉරංග) කලා කෘතියකින් භාවමය කම්පනයක් ඇතිකළ හැකි නම් එයට කිසියම් සමාජ බලපෑමක් සිදුකළ හැකිය. එසේ කම්පනයත්, පශ්චාත්තාපයත් ජනිත කළ, දමිළ බසින්... [More]
අදහස්| විද්‍යාවේ සියවසක පිම්ම!

2-Mins

(තාරක වරාපිටිය) පසුගිය සියවසේ මිනිස් ශිෂ්ඨාචාරය මුහුණපෑ ප්‍රධාන මාරක අභියෝග තුන වුයේ වසංගත, සාගත හා සංග්‍රාමයන්ය. ඒ සියවස තුල එසේ ඉන් මියැදුන... [More]
කරන්ට්ස්| "අඟ"

19-Secs

(උපුල් සේනාධීරිගේ) අංඟ පුලාවකට නැති මිනිස්සු
තම හිස අත ගෑහ
අඟක්... ඔව් අඟක්
රයිනෝසිරසක හැඩගත් අඟක්
මොළයක් නැති සිරසක්
තෙතක් නැති හදවතක්... [More]
වෙසෙස්| ඇනා කැරනිනා සහ ඇනා ස්ටෙපානොව්නා

7-Mins

(ඩිල්ෂානි චතුරිකා දාබරේ) ලියෝ තෝල්ස්තෝයි විරචිත ඇනා කැරනිනා නවකතාවේ ප්‍රධාන කථා නායිකාව වන ඇනා අර්කෙඩියෙව්නා කැරනිනා නමැති චරිතය ගොඩනැංවීම සඳහා තෝල්ස්තොයිට කාන්තාවන් කිහිප... [More]
පරිවර්තන| යෑම සහ ඒම අතර

20-Secs

(ඔක්තාවියෝ පාස් | නිලූක කදුරුගමුව) තම විනිවිද පෙනෙනබව සමඟ
ආලයෙන් බැඳුණු දහවල
අවිනිශ්චිතව ටැග්ගැහෙයි
යෑම සහ නැවතීම අතරමැද.
මුළු ලෝකයම නිසලව නැලැවෙන
මුහුදු බොක්කකිය දැන් වටකුරු පස්වරුව.... [More]
Boondi Dot Lk · බූන්දියේ අපේ වැඩක් · editorial@boondi.lk
Home · Currents · Raha · Sookiri · Kavi · Dosi · Music · Plus · Facebook